Komlo
Heisann! Eit lite comeback på forumet for meg, då det er 10 år sidan førre post:) Etter om lag like mange år utan båt, vurderer me no å skaffa oss båt igjen. Håpar derfor forumet kan hjelpa meg litt med tip, då me ikkje har greidd å peika oss ut ein bestemt modell.
Budsjett:
Opp til ca. 100 000kr er det kona har gitt grønt lys for. Det kan nok strekkjast ein del, men eg håpar sjølvsagt på å kunna bruka litt mindre.
Krav til båten:
Kalesja og vindskjerm - slik at den kan nyttast større delar av året på vestlandet
Utanbords motor
Sitjeplass til/godkjent for 6+ personar - Vår familie + ein eller to ekstra
Minimum ca. 30 knop - Planar når den er fullasta
Ønskjer
Relativt ny motor - mtp. forbruk og støy.
Godkjent båthengar - Kan og kjøpast utanom.
Minst mogleg båt som dekkjer vårt behov - Lettare båthald, betre økonomi, mindre krav til motor osv.
Lettkøyrd - krev ikkje enorm motor.
Ikkje så viktig
Korleis den handterer grov sjø/sprut osv - Den vert brukt i hardangerfjorden og skal ikkje på havet i stiv kuling.
Sjølvlensing - sjølvsagt kjekt, men ikkje eit must då me skal ha kalesja, og den sannsynlegvis vil stå i hagen på vinteren.
Alt som gjer ein dagsturbåt til ein overnattingsbåt - Sikkert kjekt med portapotti, stereoanlegg og kjøleskap, men det er ikkje noko me treng i ein så liten båt.
Utgangspunkt
Me er ein familie med barn på 4 og 8 år. Båten vil verta brukt til dagsturar for bading, fisking o.l. Me ønskjer ein båt der det og er mogleg å ta med eit par vener eller besteforeldre på fisketur. Me har vurdert større båt for overnatting/ferie (spesielt eg), men har bestemt oss for noko mindre i denne omgang. Eg har tidlegare hatt ein Nidelv 24, som eg var særs nøgd med, men denne gongen må fart trumfa comfort.
Kona likar sjølvsagt alle båtar som er nye, store, blanke, fine og dyre som t.d. Ibiza 19 touring, nyare Askeladden, Uttern o.l. Eg har derimot alltid hatt sansen for eldre båtar som With Vital 15, Skibsplast 490vs, Wesling, Fjordling, Nordkapp osv. Det me har funne som ser ut til å vera eit kompromiss er Skibsplast 500CL, som ser kjekk ut, men eg har ingen erfaring med den. Og Askeladden 585 Explorer, som er litt stor og dyr.
Me har tidlegare kika ein del på 10 - 20 år gamle daycruiserar på 17 - 19 fot. Me treng ikkje overnattingsmuligheten i dei, men det er no ein bonus om ungane kan sova der. Problemet er at det stort sett er 5 seter og kun godkjend for maks 5 personar på desse båtane. Me har så gått over til å kika ein del på bowriderar rundt 17 fot, då desse har meir praktisk plassutnytting for vår del og fleire sitjeplassar. Men og her er dei fleste kun er godkjent for maks 5 personar. Som og er antal sitjeplassar under kalesja. Sikkert ikkje lurt å la svigermor sitja i bauen når regnet kjem på fisketur.
Håpar nokon kan koma med tips og råd for kva me bør sjå etter.
